ఇది ఆర్యవైశ్య స్వాభిమానుల సమూహం. సానుకూల దృక్పథం గల వ్యక్తుల బృందం. వేములవాడలో పుట్టి పెరిగినవారు, వేర్వేరు ప్రాంతాల నుంచి వేములవాడకు వచ్చి జీవనం సాగిస్తున్న వారు కలిసి అరమరికలు లేకుండా ఏర్పాటు చేసిన సేవాసంస్థ. ఈ ప్రాంత మిత్రులు, శ్రేయోభిలాషులు, పెద్దలు, గురువులతో చిన్ననాటి సంగతులపై, సంభాషించుకోవడంతో అంకురార్పణకు నోచుకున్న ట్రస్టు ఇది.

కరోనా విజృంభించిన సమయాన.. కుటుంబసభ్యులే పట్టించుకోలేని విపత్కర సమయాన.. బతికుంటామో లేదోననే భయంతో మనిషితో మనిషి మాట్లాడడమే గగనమైన సమయాన.. మేము మా సేవలు మొదలు పెట్టాం. తొలుత ఏ దిక్కూలేని కరోనా పేషంట్లకు భోజనంతో పాటు తొందరగా కోలుకోవడానికి అవసరమైన ఆహారాన్ని సమకూర్చాము. ఐసోలేషన్‌ సెంటర్‌లో ఉన్న కొవిడ్‌ రోగులకు, వైద్య సిబ్బందికి ఉదయం అల్పాహారం, మధ్యాహ్నం, రాత్రివేళల్లో భోజనం అందజేశాం. ఆదిభిక్షువు నెలవైన వేములవాడలో ఎన్నెన్నో అన్నసత్రాలున్నాయి. వాటి మీద, వచ్చే యాత్రికుల మీద ఆధారపడి పొట్టపోసుకునే అభాగ్యులు వందల్లో ఉన్నారు. వారికి కరోనా సమయంలో తిండి దొరకడమే గగనమైంది. ఆకలితో ఎవరూ అలమటించకూడదనే ఉద్దేశ్యంతో మేం వారికి అన్నప్రసాద వితరణ చేశాం. అలా మొదలైన మా సేవలు ఇంతింతై.. అన్నట్టు నిరంతరాయంగా 800 రోజులుగా సాగుతున్నాయి. మా సేవల్లో నిస్వార్ధతను గమనించిన పురప్రజలు, బయటి ప్రాంతాల వారూ.. తమవంతు సాయంగా విరాళం అందజేస్తున్నారు. బారసాలలు, పుట్టినరోజులు, పెళ్లిరోజులకే కాకుండా గతించిన పెద్దల కర్మ రోజున, సంవత్సరీకం సందర్భంగానూ వారి పేరిట భోజనం పెట్టిస్తున్నారు. ఇలా రోజుకు 50 భోజనాలతో మొదలై ఒక్కోసారి 500 భోజనాలు పెట్టే దశకు ట్రస్టు చేరుకున్నది. ఇది అందరి సహానుభూతి వల్ల, సాయం చేయాలన్న దృక్పథం వల్ల సాధ్యమైంది. ఇలా రాత్రిపూట భోజనాలందించేందుకు అవకాశం దొరకడమే కాకుండా అటు భోజనం ఏర్పాటు చేసినవారికి, ఇటు భోజనం తిన్నవారికి సంతృప్తి కలిగించే తృప్తి మాకు దక్కింది.